蔣麗莎抱女冇位坐溜冰場爆罵戰

來港定居照顧子女的蔣麗莎昨日在社交網上載兩條在溜冰場拍攝的短片，片中見一名坐在長椅上的女子勞氣地說：「你想坐，OK，你講，冇問題！」並見其身後放有她的背囊，之後聽到蔣麗莎說：「真係夠晒離譜！呢個位畀佢擺電腦，我依家抱緊小朋友呀！」另一段片中，有一個小朋友想坐下換鞋，蔣麗莎提醒他「坐過啲」：「佢話有好貴重嘅嘢喺裏面，呢張櫈唔係畀人坐，係畀佢個袋擺電腦。」該女子聞言繼續勞氣地說：「係佢自己盲咋嘛！」不過片中見有其他小朋友想坐下換鞋時，該女子繼續擺袋冇讓座，難怪蔣麗莎說：「所有小朋友Change Shoes（換鞋）都喺呢度，你郁都唔郁。咁樣嘅香港人好犀利，完全冇公德心！」

囡囡扭傷被推開

蔣麗莎留言解釋事情始末，指女兒當時扭傷要換鞋：「想不到被背後的女人一把推開，說我不應該坐這裏，因為她的書包裏面有超級貴重的電腦，我幾乎是半靠在椅子上，因為位置少到可憐！手裏還抱着孩子…居然一直罵罵咧咧，仗勢欺人，太離譜了」、「社會公德心都去哪裏了？現在的社會都病了嗎？看到手抱兒的婦女，老人，兒童，無一讓座，這個世界猶如滑冰場一樣太冰冷了！」

陳浩民未知老婆受辱

她昨日接受本報電話訪問，直指涉事女子惡言相向：「我得三分一屁股坐埋去，冇坐到佢個袋。我話好逼，同佢講張櫈唔係畀佢擺袋，佢唔理我，搏命鬧我，仲話我係八婆，好似我坐爛佢電腦咁。現場有閉路電視，可以睇番。第一，我冇坐上去（個袋）；第二，呢個係公眾地方，唔係你屋企，你應該攞走個袋畀更多有需要嘅人坐。」

她指老公陳浩民身在內地拍戲，故未知此事：「呢個同中港矛盾完全扯唔上關係，係個人素質問題，呢位女士唔代表全香港人，佢都冇呢個資格。經過一番理論後，佢依然用佢個袋霸佔公共空間。現場有好多小朋友同老人家想坐，佢當睇唔到，仲當住我啲小朋友面前講粗口，好失禮。公道自在人心，我只係對事唔對人，今天唔理係香港人、美國人或日本人，我都一樣會出聲！」