歌手陳柏宇（Jason）昨日到新城受訪，提到日前上載惡搞《星期二檔案》的短片宣傳新歌《認真如初》，他自言經常有無聊意念：「幾年前已經想拍嘢，但一直都懶，又唔知有咩人可以幫手。依家當工作，公司就會配合。」問到可會與太太拍片？他表示暫時不會，但已計劃好待女兒出世後開影像網誌：「由佢唔識講嘢已經開始同佢討論。（傾咩？）可能每年做12個題材，下一年可能會有啲相同嘅，因為佢嘅睇法會改變，其中一定係講拍拖，記錄住佢喺唔同年紀對男仔嘅睇法。」
