楊洛婷「榨乾」老公追多個要抖抖
有「火辣靚媽」之稱的前港姐楊洛婷誕女後，女兒由兩夫婦一腳踢照顧，還爆老公最愛幫囡囡洗白白。心急的她本想即刻開動追多個B，反而是老公呻湊得辛苦，要稍作休息。
楊洛婷為東網巨星節目、「海馬牌床褥特約」《閨蜜睡房》擔任嘉賓，與主持李惠儀（Kiwi）分享家庭樂。她透露囡囡Tanya快將1歲大，出世至今都由她與Dear Jane主音老公阿Tim親手湊大：「我屋企一直都冇『姐姐』，我哋一手一腳照顧佢，感覺會親密啲！而且我都有訓練老公湊BB，要識得換片、洗奶樽同煮飯仔，如果佢喺香港，仲會晚晚同個女沖涼，因為佢有少少潔癖，幫個女沖得好仔細、好乾淨。」
搬埋屋先敢「造人」
正所謂「一不離二」，楊洛婷坦言有計劃追多個：「我一生完見我個婦科醫生，都即刻問醫生我幾時可以再生？佢話下個月得o架喇，但阿Tim話要抖吓先。」她直認已開始努力「造人」：「其實我想再快啲，不過因為我哋要搬屋，傳統話大住肚搬屋、裝修都唔係幾好。」
雖然在外國長大，但鬼妹仔性格的她竟然信風水，她笑說：「入咗行之後見個個都信風水，如果我唔信咪好蝕底！所以我都有搵啱傾嘅師傅問吓。」與老公由拍拖到結婚一直Sweet到爆，兩人經常放閃，肉麻到痹，想知道兩人的愛情史？記得本周五、六、日收睇《閨蜜睡房》！
