陳家樂為檸茶甩拖衛詩雅錯過暖男
英皇藝人陳家樂與衛詩雅到銅鑼灣出席大家樂惜食活動，席間談起年少時拍拖的青葱歲月，家樂自爆因一杯檸檬茶而「被分手」；而獲初戀男友照顧周到的詩雅卻「走寶」，又打趣稱呷家樂醋！
陳家樂與衛詩雅昨午出席大家樂「粒粒力量LOVE LOVE香港」惜食活動啟動禮，並與舞者齊齊跳「惜食舞」作呼籲，家樂更吸引大批粉絲到場支持，場面熱鬧！自認「飯桶」的他自爆每餐最少食兩碗飯，反而詩雅笑說：「我出街食飯，每次都食唔晒，以前就會撥畀男友，食到我媽咪都話佢肥咗，依家冇拖拍，惟有靠家樂呢啲朋友幫手。」
篤檸檬兼試味
談到飲食習慣，原來二人一直喜歡光顧快餐店，家樂更自爆：「我中五嗰年同女友日日去快餐店食下午茶，拍吓拖先返屋企，結果3年後佢突然同我講分手，死因原來係我從來冇幫佢篤過檸檬茶，依家佢搵到個會幫佢篤o架喇！」詩雅則相當幸福：「呢方面我初戀男友就做足，佢仲貼心到篤完幾下，畀我試味先，不過當時我仲細，得17歲，唔係好識嘢。」
搭枱醫肚被認出
問到另一半是否都肯陪自己去快餐店？家樂坦言：「個個都肯，拍拖都係過時過節先食好嘢。（依家仲有去快餐店？）有，尋日我唔係好舒服，所以戴住口罩仲冇位要搭枱，對面個媽咪抱住個小朋友，見到我即指住大叫『爺爺』，估唔到咁都認得我。」詩雅即接口：「我3歲個姪女同我Facetime，一見到家樂喺我隔籬就唔理我，對住佢大叫『爺爺』，我呷醋囉！（好彩唔係叫姑丈咋！）啋！講呢啲！」