雨僑搭霸王？車蝦碌非常遊
升呢人妻的雨僑早前撇甩老公羅力威，飛到南非拍攝節目，寓工作於旅遊當然開心，她大讚當地人非常友善，對陌生人以誠相待，會百分百投以信任票，大讚很難得，傻更更的她更遇上「蝦碌」趣事。
因為隨攝製隊出發南非之行，雨僑沒兌換南非錢，只有美金傍身，最尾一天「自由行」的她跟兩個朋友乘的士外出，因有人曾表示搭的士可用信用卡付款，她遂大安旨意，怎料的士司機只收現金：「我話佢知冇錢，佢話唔緊要，問我住幾號酒店房，晏啲去拎番，就畀我哋落車。」
回程時他們同樣搭的士，但就請司機先載他們到找換店，她說：「我哋有三個人，咪諗住留低一個人，費事司機以為我哋走咗去，但佢好好人話唔使，叫我哋一齊去，佢喺度等，我哋搵找換店都搵咗好耐，但個司機完全冇嘢咁喺度等，佢哋好相信任何人，唔會猜度你。」
彩屋打卡
雨僑大讚St.James Beach很靚，推介與彩色屋仔合照：「呢度水清沙幼，沙灘上有一排彩色屋仔好靚，不過啲屋仔係吉嘅，入面好細o架，只係點綴供人拍照留念。」
草原觀鳥
Aquila Safari是當地著名的大草原保育區，她獲安排在該處Resort住了一晚，翌日凌晨就往睇獅子，另一日又到訪鴕鳥園，不過她不敢走得太近，笑言：「怕畀鴕鳥個嘴啄到。」
營火取暖
Grootbos Private Nature Reserve是另一個保育區，當日的晚飯就在營火會享用，穿上薄衫短裙的雨僑自言凍到暈：「好彩有火喺旁邊，餐廳仲準備咗厚披肩畀我，成張被咁厚，好貼心。」
果園苦工
這是蘋果園農場，專製造Apple Cider，並非向外開放，據雨僑所知，在果園工作的民工來自五湖四海，生活頗刻苦，因烈日下實在太曬：「我摘咗一陣都好辛苦，好攰，因為蘋果愈近樹頂受光係愈靚，冇咁靚、冇咁紅嗰啲唔值錢，就會攞嚟做果醬或其他用途。」
開懷暢飲
另一日大隊住入Azura酒莊，參觀葡萄園，每朝起身走出露台欣賞美景，確是賞心樂事，她說：「呢個酒莊好大，有幾十間客房，嚟品酒嘅人可以住，佢哋提供嘅早餐同一般幾星級嘅大酒店一樣，好豐盛，我哋一早就可以試酒，雖然早餐我唔會飲酒，但拍節目由早到晚，每一餐真係飲好多杯酒。」
華客罕至
其實此行走訪不少酒莊，穿上背心露肩裙的雨僑，不時凍到打冷震，她說：「佢哋啲酒莊真係好靚好大，我哋去嘅地方唔係旅遊區，所以成程冇乜見過華人，當地人見到我拍嘢，又唔會特別好奇。」
旱災制水
由於到訪南非時，正值當地旱災，雨僑坦言：「好多地方都有貼告示，叫大家珍惜食水，我一落機喺機場去廁所，係冇廁所水，又冇水洗手，好彩自己攜帶咗好多支洗手消毒液。」
極速登山
桌山是南非著名景點，整個山頂平坦，一望無際，開普敦整個城巿都望到桌山，雨僑說：「就好似香港人望到獅子山咁，桌山嘅纜車唔係成日開，因為好斜，如果風勢大少少都唔會開，當日早上纜車都冇開，好彩我哋下午去有開到，雖然短短一分鐘車程，但個景色真係好靚。」