薛家燕讚唔收錢 阿驄：第日屈鋪杰！

《薛家燕愛你無限60年演唱會》昨日開賣，她特別邀請有份為個唱主題曲《Captain Nancy》客串拍MV的好友林敏驄上電台錄音。他開心表示MV現時點擊率升至幾十萬，又指今次因對方親自打電話誠邀，故一定會支持。

憶述拍攝當日，薛家燕讚他即使拍到凌晨2時才收工都冇怨言，又夠義氣唔收「利是」。阿驄坦言是為對方荷包着想，如果有老闆撐腰的話就一定開正價︰「我當你屈我（拍攝），我第日咪屈番你囉！我哋慣咗唔畀，諗住屈番你一鋪『杰撻撻』嘛！」令她當堂笑到連眼水都標埋，接住再爆另一客串好友邵音音亦冇收錢：「佢同我講：『我好多錢(o架)！唔使畀我。』個個都咁好人﹗」

幫曾江謝賢破冰

提到今次開騷，薛家燕獲各方好友拍片支持，包括黎小田、許志安、G.E.M.（鄧紫棋）等，其中黎小田讚主題曲好聽，還鼓勵她︰「你由童星一路奮鬥到今日，同時有三個兒女，係一件非常唔簡單嘅事。」她又特別點名多謝佘詩曼︰「佢着住《延禧攻略》嘅嫻妃造型叫我『燕妃』添呀！真係好多謝﹗」個唱嘉賓則有「七公主」及「三個小生」，相信可以幫傳不和的曾江與謝賢破冰！

另外，提到近日有傳33E女藝人張沛樂（沙律）被男拍檔「鹹豬胸」，梁漢文（Edmond）成為嫌疑人物之一，阿驄聞言即大膽抽水：「家燕姐試得多啦！」其後才嚴肅為好友平反：「佢點會呀？佢係好好先生！」