尚羚中環Busking阿正捱熱氣陪唱
樂隊RubberBand主音阿正與結婚兩年的爵士歌手老婆尚羚一向恩愛，近日他傍實老婆Busking，享受做背後的男人，名副其實廿四孝「正」老公！
阿正（馮庭正）為圓老婆尚羚（Sherine）的爵士歌手夢，除為其新碟作曲，又經常陪她出國進修學唱，可謂仆心仆命！籌備三年的新碟今年終於面世，阿正繼續奉陪冇停過，早前尚羚獲邀到中環的大館Busking，他自薦做結他手，當日下午約五時，身穿白色通花連身裙的Sherine化了淡妝，與短打上陣的阿正在半露天廣場表演，在老公伴奏下，Sherine加倍落力，連唱多首英文歌，其中特別加插一首廣東歌，而現場石階都坐滿人，每當Sherine唱完一曲，觀眾都報以掌聲，阿正亦有鼓掌讚好，氹得老婆甜笑。
摸面珠仔冧爆
完成七首歌的演出後，阿正蹲在地上收拾結他，Sherine突然走到他身邊，摸着老公面珠並細語幾句，阿正即一副冧樣。其後友人為他們拍照，他倆黐到實坐在石階上擺甫留影。對於老公抽時間為她伴奏，Sherine大讚冇得頂：「我同佢講，我又飛兩個月，你仲唔陪我？兩日前佢先決定嚟到，咁啱得閒。（佢都拍手讚你唱得好！）佢好Nice，好彩有啲風唔焗，唔想辛苦佢，佢已經着短褲。（叫佢唔好着？）要練吓腹肌至得。」
