許家傑誓回家唔丟低林淑敏

藝人許家傑（Jack）、林淑敏與呂慧儀昨日出席無綫劇集《愛．回家之開心速遞》宣傳活動，有指Jack因拍攝新劇，被迫離開《愛》劇，變相拆散「送水輝」與「大小姐」的戀情，不少網民大呼失望。

「飛唔出手指罅」

Jack澄清即使拍新劇，亦會繼續「回家」：「之前拍《兄弟》、《反轉貴利王》都有繼續拍，我唔會丟低《愛．回家》，唔會丟低大小姐，合作好舒服。」並笑言現在需要戒睡覺。林淑敏亦不擔心對方離開劇組，笑他「飛唔出《愛．回家》手指罅」。問到何時會有親熱戲？她說：「難啲，我哋嘅感情係意會。」

呂慧儀造人欠情趣

同場的呂慧儀未有帶愛子「蟹籽」到場，她解釋囝囝去了學游水：「依家佢4歲，做好多嘢都冇人幫，好似刷牙、食飯咁，4歲啦要自己做。」問到想不想再生？她笑言：「我身體幾好，隨時都Ready，但係叫老公畀心機搵多啲錢先。（想生？）隨緣啦，太忙都少見，又差咁啲情趣啦，連拍拖都冇時間，依家唔係工廠式生產呀！」

呂慧儀坦言自從囝囝出世後，未試過兩公婆去旅行：「我哋連去飲都帶埋個仔，我啲朋友變成佢啲朋友。」又指囝囝曾想要細佬妹，但轉頭又不想與人分享父母，待他學識照顧別人，才會考慮再生。

呂慧儀坦言工作忙碌，冇時間造人。

「送水輝」與「大小姐」形象入屋，非常受小朋友歡迎。