英國著名男子組合One Direction（1D）的24歲成員Liam Payne雖然已做人老竇，但仍未修心養性，六周前才與英國女歌手Cheryl分手，最近已傳出極速戀上18歲有錢女粉絲！
驚爆戀情的花花公子Liam與妙齡女粉絲Maya Henry，被傳上月在意大利參加時裝品牌晚宴派對重遇，雖然Liam已忘記對方，但見到她亭亭玉立兼已成為模特兒，即時心動！
據知，Maya的家底相當雄厚，父親是律師。她一直都是1D的忠粉，當年只得15歲便參加1D見面會，與一眾成員見面合照，其中更與Liam面貼面，十分親密！
其後，兩人關係火速升溫，被拍得到法國康城齊齊遊船河，上周更秘密前往倫敦的酒店共度春宵，為掩人耳目而前後腳離開，有知情者說：「佢哋進展好好，仲咀過好幾次，但Liam唔急住再拍拖，亦肯定未準備好正式拍拖。佢依家只係專注工作，當然優先考慮係個仔Bear。」
至於Cheryl失戀後寄情工作，前日在社交網公開參演跳舞才藝節目《The Greatest Dancer》的照片，35歲的她晒出結實腹肌，與拍檔Matthew Morrison等合照，有網友即留言：「女王已回歸！好期待！」