現年30歲的無綫咪神陳庭欣（Toby），早前被爆撻着擁逾億身家老闆級的楊振源（Benny），消息曝光後她未有回應，繼續低調拍拖！但昨日凌晨時分，Toby突然一反常態，在社交網晒出拍拖行山相，被Benny攬實纖腰，二人勁甜蜜，外間揣測她好事近。
港姐冠軍Toby憑33.5C蜜桃胸收兵不少，最為人熟悉要數前香港先生翟威廉，兩人2010年撻着，Toby多次被目擊去男方屋企過夜，維持了數年的地下情最後玩完。其後她再發功，轉戰法律界與有米律師唐偉倫拍拖，惟2年情始終未能開花。但分手短短數個月，她便成功撻着現年40歲、坐擁美容王國兼身家過億的Benny，雖然曾被指搶人男朋友做「小三」，更有指Benny未分手便與Toby交往，不過，幸得Benny發表愛的宣言親證她的「女主人」地位！
委屈過後見曙光，Toby昨日凌晨晒與男友合照，問到是否好事近？她回覆說：「唔係唔係，其實冇其他意思嘅！主要係因為尋晚去仁濟活動，見到太多舊朋友，好多好耐都冇見，佢哋都好關心同問起我嘅近況。唔想一班自己認識多年嘅朋友要睇報章雜誌去知我近況，最慘睇完又唔係事實嘅全部，所以我自己喺IG同facebook分享吓！（依家去到咩階段？）正常拍拖關係啦！（幾時結婚呀？）好多人問同一個問題，如果有呢一日再通告大家！（成日約埋行山？）大家都鍾意做運動，行山最近少啦，太熱怕中暑！（游水囉？）我一向都鍾意游。（晒完美Body？）冇啦！年紀大，難Keep，新陳代謝慢咗！」