黃宗澤阻爆料偷襲吳卓羲
藝人黃宗澤（Bosco）與吳卓羲老友鬼鬼，為無綫節目擔任嘉賓時一唱一和取笑參賽女星廚藝，表現興奮的卓羲更擺Bosco緋聞上枱，結果Bosco徒手拿起訪問咪襲擊及笑罵他，場面搞笑！
Bosco與卓羲前晚亮相無綫節目《美女廚房》，剛於西班牙拍攝綜藝節目的Bosco，透露每日應付近20小時的拍攝大感疲累，問到酬勞是否很可觀？他笑住否認。談到離港期間，緋聞女友陳嘉桓（Rose）可有上門幫他執屋？他說：「我有請工人姐姐。（佢今次上節目挑戰廚藝？）唔係啩，我都唔知喎！（事前冇同你講？）冇喎！」在旁的卓羲抵死加入戰團：「有都扮唔知啦！」雖然Bosco表示不介意與Rose同台演出，但卓羲繼續入位：「咁一齊住呢？」Bosco聞言即拿起訪問咪襲擊卓羲，並笑罵他「死仔！」非常爆笑！
兩人繼續講唔停，曾於上輯做過嘉賓的Bosco，不諱言難以忘記當年試食的感受：「嗰Pat鴨屎綠色嘢同臭味，今次應該唔會衰過上一次。（食嘢打定底？）唔食啦！盡量令自己餓啲，感覺上會好食啲，會睇到熟先食。（全部都唔熟o架喎！）咁有啲淆囉！」同樣做過嘉賓的卓羲，笑指試食後唔多唔少也會肚屙，今次獲邀任嘉賓時，被告知預定食生嘢，故他也預料食物唔熟。
張振朗講起定欣耳仔紅
至於張振朗則繼續否認戀上胡定欣，自言每套劇均有緋聞出現，故會平常心以笑面對。對於有指他經常在劇組玩小玩意，氹得定欣開心非常，他聞言即耳仔紅說：「怕醜囉！我冇特登氹開心，真係搞笑，咁我、定欣、姚子羚、東閔好似兄弟姊妹咁！（緋聞有冇影響你同定欣關係？）不嬲唔會特別去搵，係正常朋友咁！（影響你溝女？）不嬲冇女溝，我事業為重，冇時間諗其他嘢！」昨日有指定欣與振朗於橫店開工時，雙方家長均有前來探班，故順道見家長，不過兩位當事人未有再為此回應。