胡鴻鈞想男女通殺

歌手胡鴻鈞昨日舉行大碟金唱片頒贈儀式暨歌迷聚會，對於第二度錄得過萬隻銷量的金唱片，他說：「依家仲可以出碟好幸福，好開心可以得到歌迷支持，不論係網上或買實體碟，對歌手嚟講都係好大嘅鼓勵。」講到現場有不少師奶粉絲，問他是否想做新一代「師奶殺手」？他笑說：「眼光要再闊啲，我要做所有人嘅殺手，唔淨係師奶，巴打絲打全部都要！（同鄭俊弘爭做師奶殺手？）其實我哋啲歌迷會互相支持，買大家嘅碟。」講到有指同門的何雁詩不續約，他即指鄭俊弘已以對方枕邊人身份回應了，故自己不講太多。