小生花旦輪住走 陳智燊離巢無綫 大肚老婆照撐

近半年無綫有不少小生及花旦如郭晉安、鍾嘉欣、岑麗香、林夏薇等相繼離巢，昨日陳智燊亦於社交網宣布離巢消息！自小在英國長大的Jason，2006年加入無綫電視第20期藝員訓練班，之後簽約入行，因能操流利英語，被推薦加入明珠台做節目主持，事業漸有起色。後來在處境喜劇《誰家灶頭無煙火》中，首次擔任第二男主角而備受注目，2012年更擔正劇集《幸福摩天輪》男一，其正面及暖男形象深入民心。

捱足12年轉做網紅

Jason昨日現身書展活動，被追問與無綫結束十二年賓主關係，他說：「因為太多人問，我唔想太多揣測，想透過呢個機會多謝樂小姐（樂易玲）、余詠珊同曾勵珍，我未攞過獎，冇得喺台上多謝佢哋，但係有需要多謝，我可以拍到戲同做主持都係因為TVB。」Jason稱離巢是想在內地、新加坡、馬來西亞甚至英國有新發展，例如拍電影、舞台劇等：「尤其事業去到呢個階段要鼓起勇氣去做，我自己又貪玩。（已經有人斟你？）有傾，但未傾成。」近年不時拍片做YouTuber的他，被問會否轉行？他說：「唔需要同演員分得咁分明，網上好多人都玩，就算荷里活嘅Will Smith（韋史密夫）都有拍片。（離巢因冇獎攞？）唔關事，我都好唔捨得公司，婚後有諗點去做好自己，好清晰。」

闖歐亞唔容易

懷有身孕的太太宋熙年，預產期為9月，問是否想出外發展搵奶粉錢？Jason說：「未至於有呢個壓力，但係有個動力去做好自己。個決定唔容易，好似由英國返嚟香港都要唔少勇氣，公司好錫我，畀咗好多機會我，咁多年識咗好多朋友，覺得呢個時候做決定係OK。」至於太太宋熙年會繼續留守公司：「公司對佢好重要，工作穩定同舒服，又好錫佢。（公司有冇挽留你？）佢哋個個都有同我傾，樂小姐、余詠珊同曾勵珍都好錫我，我都諗得好詳細。」

他出席活動前，亦在社交網感謝各位恩師栽培：「加入TVB後得到好多人嘅愛戴。樂小姐（樂易玲）不斷帶當時嘅我出活動，不停搵機會畀呢個新人。Sandy（余詠珊）亦都畀咗好多做主持嘅機會。我要多謝所有合作過嘅同事，喺TVB呢個家庭可以過得咁開心全因為你哋……」而宋熙年受訪時亦表示支持老公決定：「夫妻互相支持及尊重！」