「紙板BB」被米飯班主列入黑名單

「紙板BB」雖然話唱歌又拍吓戲，但近年好似做KOL多，恃住有啲品牌、時裝騷仔邀請吓，佢簡直當自己係超級紅星，不單睇唔起身邊嘅藝人朋友，有次有個運動服品牌搵佢做活動，畀咗對最新款嘅波鞋佢着，點知佢擰轉面就嘴藐藐跟助手話：「好肉酸！」又話要自己揀對好啲款，個客嘅同事知道佢勁彈後，勁嬲話唔會再搵佢做嘢，但因為畀咗錢佢出席活動，到咗嗰日個客就拎番最新款嘅波鞋畀佢着，佢即刻變臉大師上身，拿拿臨着上腳，仲對住個客嘅老闆、高層大讚對鞋好鬼靚，但佢唔知啲職員話晒畀老闆知，佢藐啲波鞋唔靚，個老闆仲話將佢列入黑名單添！