陳嘉桓認過夜讚黃宗澤啱口味
藝人陳嘉桓（Rose）近日被拍得出入黃宗澤新居而傳緋聞，身為女主角的她昨日亮相活動時為緋聞解畫。席間Rose笑指自己食相「呃到人」：「可能一般好味，人哋睇住我食，以為真係好好味。我比較男仔頭，朋友叫我『恒仔』，因為桓同恒字形似，大家成日叫錯！」
送上門睇波
對於與黃宗澤（Bosco）的緋聞，她似有備而來，被問到有否試過對方廚藝時，她即大方回應：「有，大班人上佢屋企開派對。（你泊架車喺佢樓下幾日，過埋夜喎。）嗰排世界盃，睇完波凌晨4、5點先走，咁都算過夜嘅，走我一定揸走架車，可能係時間上嘅誤會，其實佢屋企，個個都可以揸車去（意指訪客車位多）。」
唔覺被追
她續指與Bosco太熟，未感到對方有追求之意，但當問到對方是否她「那杯茶」時，Rose笑說：「呢類型係唔錯。（考驗吓佢先？）同行大家明白大家嘅，不過我真係冇諗，依家Keep Fit成功，想做吓嘢先。（咁大班人個個唔傳，只係傳你。）唔知，可能（記者）淨係見到我啩。（再去佢屋企？）佢唔喺香港，況且世界盃完咗啦。」問到是否每天與Bosco保持聯絡，Rose即答：「咁我仲有好多朋友可以交流溝通嘅，唔只佢一個。（有冇試過單獨約會？）冇，一大班人食飯o架。」
