藝人林盛斌（Bob）昨日為潮州私房菜開幕儀式任司儀，指三個囡囡飛到加拿大探姨媽兼放暑假，令他感覺空虛：「啲女喺加拿大上Summer Camp，好貴呀，但每次去完，佢哋都會獨立啲！」
談到近日何依婷上他主持的節目《Big Boys Club》，以「所謂嘅保母」來形容選港姐時照顧她們的保母，與鍾晴的「憎狗論」同樣令人反感，當時Bob即場教訓對方，昨日他說：「唔好話教訓，後生仔女有時講出嚟冇心，希望大家唔好怪責佢哋，當時我補番句，只係想氣氛冇咁僵。」又力撐何依婷準時、有禮貌。
