張秀文溺寵太郎底底遭殃
無綫咪神張秀文不單樣靚身材正，更加是愛心爆棚，大半年前開始養柴犬「太郎」，加入「狗奴才」行列後，從此生活變得多姿多采，亦因養狗而要增添內衣褲。
張秀文與「太郎」亮相東網巨星節目《巨星Pet Pet》，兩者相處以來溫馨無比，只是偶爾被「太郎」摷晒內衣褲出來咬，輕則成條底底染滿口水要再清洗，重則就被毁爛不堪要再置新。雖然近半年其內衣褲使費增加，但「太郎」樣貌惹人憐愛，見者開心，她說：「柴犬呢個品種我一直都好鍾意，見到太郎時就更加係一見鍾情，冇得講，我被佢俘虜咗！」
游水醫腳患
「太郎」向來有腳患，張秀文痛心又擔心：「幾個月前見太郎跑步同跳躍時，後腳拐拐吓，仲有一次突然大叫，表現痛苦，獸醫話係右後腳膝蓋骨移位，建議做手術。我唔捨得，佢年紀太細啦！有個朋友隻貴婦狗又係同一個問題，最後發覺游水可以改善，我咪帶太郎去試吓囉！太郎一個月游兩次當係運動兼物理治療，一舉兩得！」
自轉玩花式
《巨星Pet Pet》直擊張秀文同「太郎」游水及沖涼過程，經過五、六次治療後，已見一定效果。「太郎」寓戲水於治療，在私家泳池中開心得自轉表演花式，雖然水花四濺，但氹得主人笑不攏嘴：「佢第一次落水有啲驚，不過好快就適應同埋表現得好開心，係我第一次見到真真正正嘅狗仔式，好Cutie。」
《巨星Pet Pet》繼傅穎、李旻芳、羅敏莊母女及楊秀惠等十多位紅星帶同寵物亮相後，其他陸續登場，大家可透過東網App及東網網頁隨時隨地收看及重溫。
太郎
PROFILE
年齡：一歲
性別：雄性
品種：日本柴犬
飼養年期：大半年
特性：愛咬內衣褲
性格：內向、怕醜、與人相處表現熱情
https://bit.ly/2L2whac