茶記情聖 偷食都講文采 子善「鴛鴦」不羨仙

話時話，喺林子善身上就睇到上帝真係好鍾意開玩笑。唔係話佢新婚冇耐，就有同第三者L小姐「呢隻寶貝」嘅情慾對話流出，而係正如網上有唔少人話齋，其實林子善個樣同被封為筍盤嘅TVB上位男神余德丞撞到砰砰聲，之不過人哋就係男神，佢就係出街都會被差佬𢭃嘅死𡃁仔，同樣唔同命，唔通生得矮有罪？呢個「矮版余德丞」無論做乜都被人先入為主，覺得佢係鬼鬼祟祟偷番薯嘅三教九流。咁叫公平咩？

冧女有計 老婆撐到底

公平！正所謂：「上帝關上一扇門，必定為你開番一扇窗。」林子善雖然身形輸蝕，得嗰1米65，但上帝就畀咗條三寸不爛之舌佢。唔止冧女有計，話連人哋隻寶貝都掛埋，就算老婆Kary知道後都力撐到底，唯獨係外母有啲微言，傳咗三個短訊畀佢，問佢「搞乜鬼」、「點解要搞呢種事」同「好自為之」。怯呀？咁你就輸一世，事關老婆個媽咪，Take it easy啦，天下間有邊個有老婆嘅男人唔係咁啫？係得伊甸園入面個阿當至係例外，因為佢冇外母吖嘛！

氹掂笑匠 樂做下把位

無可否認，子善條脷真係勁，連喺人事超複雜嘅娛圈度都咁吃得開，唔只視帝鄭嘉穎、視后唐詩詠、TVB當家小生馬國明同佢稱兄道弟，最厲害嘅係竟然連周星馳同黃子華呢兩位頂級笑匠，佢都冧得掂。要知道出名奄尖嘅星爺係幾咁難服侍先得o架，不過子善都食得住，壇數之高絕不下於洪金寶同王晶等電影界猛人。至於棟篤男神子華拍劇，更加要欽點子善做自己下把，就連一票難求嘅子華神最後一次棟篤笑演出，子善講句「撲唔到飛」咋，子華神就喺電話度同佢講：「傻仔嚟嘅，你使乜買飛呀，我留咗兩張VIP畀你！」

健身操肌 佬味狂吸女

如果子華係金盆𠺘口，子善呢個徒弟把口都係o浪過油。難得嘅係子善雖然把口叻，但佢都冇自滿，認命生得矮嘅佢，冇向現實低頭，積極玩健身操肌練大隻。要知道男人三十佬味現，頭髮、肌肉、鬍鬚三者不可少。操肌有成何止吸到女，仲幫子善吸埋《萬千星輝頒獎典禮2016》「最佳劇集」《城寨英雄》嘅演出機會返嚟。咁都未算，子善都深明娛圈花無百日紅嘅道理，何況自己條件唔及人哋？求其有個「高版林子善」余德丞冒起，佢都冇碇企啦，於是佢早年已經同朋友夾份搞茶記，係邊度嚟嘅靈感呀？之唔係「子善『鴛鴦』不羨仙」囉！

Nuts哥