無綫收視20倍拋離 ViuTV告別世盃打回原形
於上周日世界盃決賽夜，ViuTV寫下最高26.6點收視，不過翌日即打回原形，黃金時段僅錄得1.1點收視，即約7萬人次收看，相反無綫翡翠台黃金時段平均收視達20.7點，有超過132萬觀眾，以近20倍人數重擊競爭對手！藝人馬浚偉與楊卓娜亦出言力撐無綫。
四年一度世界盃已畫上句號，雖然決賽夜令ViuTV寫下開台以來最高收視紀錄，惟賽事翌日的收視即回歸基本步，前晚黃金時段僅得1.1點，就連J2台亦有1.7點，有接近11萬人次觀看，而翡翠台黃金時段平均收視更有20.7點。至於無綫本月播放劇集《宮心計2深宮計》大結局，平均收視高達35.6點，即約227萬人次收看，暫成為今年劇集收視之冠。
馬浚偉滿意成績
基於《宮》劇成績理想，無綫高層杜之克決定稍後親自設宴，與台前幕後分享喜悅，身為劇集功臣之一的馬浚偉，昨日受訪時坦言已獲知有慶祝活動，惟身在新加坡的他僅得一日空檔：「睇吓大家就唔就我，真係冇時間，返嚟香港都排晒嘢。（無綫喺世界盃後收視回復番！）希望大家都明白，世界盃實有影響，我咁多年嚟，好多劇都撞世界盃，但今年好開心，套劇有咁驚天成績，不過四年一度大事，收視有波動好正常，相信同劇集種類、質素冇關。」
楊卓娜撐《BB》有共鳴
近日於黃金時段播出的無綫劇《BB來了》亦成為網民熱話，有份演出的楊卓娜受訪時表示意料之內：「劇本好好，有啲劇情係感同身受，入面又多笑位，引起大家討論係預咗，因為題材有共鳴，無論有冇生過BB都好，每個人對屋企有新成員都好大體會，依家有咁嘅反應當然開心，知道身邊朋友好耐冇睇劇都專登返去追，我自己就鍾意陳秀珠同盧宛茵，係一對好有火花嘅組合。」