「天使胸」吊高嚟賣影水着封「露」

多年來徘徊三、四線，外貌又經常進化的「天使胸」，早幾年去過內地賺人仔就自以為升格幾千倍，野心無限放大！早排佢同朋友仔去旅行，之後仲同大家開心Share噴血泳衣照，有胸睇就梗係呃到唔少宅男畀Like，心知一對胸器係個人賣點嘅佢，吸引唔少傳媒趁炎炎夏日打佢主意，着吓性感小泳衣影靚相。

早前有人用雜誌封面嚟利誘「天使胸」，只係要求佢泳裝上陣，騷吓身材咁影輯相，絕冇賣弄成分，點知佢聽完之後就吊高嚟賣，轉晒Tone當自己係荷里活巨星咁，話其實自己只需要輕輕露一露，好似講到淨係露隻手臂都驚為天人咁，真係聽到個記者O嘴，最後當然講完句唔該就收線！既然「天使胸」咁有自信，小記就期待佢幾時得閒隨意一露，又有邊個會留定位畀佢上封面！