林鈺洧守得雲開終於有名你叫

手腳冰冷 停工調養

現年23歲的林鈺洧（Denice），早年放棄保險工作，憑43吋長腿，初入行做模特兒時，因父親林俊賢之名，曾經有過不少機會，然而模界一樣是打持久戰的戰場，父親的名氣只能讓她為人認識，卻不能庇護她一帆風順，曾經Denice也感到意興闌珊，一度轉行做名牌客戶顧問，不過近月她又重返幕前接拍電影，轉工再轉工。

Denice的心態是：「take it easy」，她解釋之前一邊做全職sales，一邊做兼職模特兒，感覺開心，但無奈身體毛病，令她一下子停工了三個月，她說：「我非常之虛，身體唔係太好，成日好攰，所以辭咗份工，朋友介紹睇中醫，解決我手腳冰冷問題，同埋調理番肥咗啲，又精神咗。（轉行計劃如何？）都係take it easy，可能遇到好嘅人，好嘅上司好嘅團隊我會去做嘅，首先佢哋要接受我係一個model，有陣時會接吓job和去event。」

近月Denice接拍了關錦鵬導演的電影，飾演其中一個小角色，已令她興奮莫名，她說：「我角色做名模，都挑戰o架，因為係做國際名模。之前都拍過戲，係啲行行企企、冇名冇對白、可能得一兩秒就冇嘅角色，但今次呢部戲，我有一個名，第一次拍戲係有名，其實真心覺得係一個好大嘅進步，希望下一部戲可能有一兩句說話講啦！慢慢進步，我唔心急，有個名，真係已經好開心。」

放大圖片	林鈺洧與父親林俊賢關係疏離。	做過不少模特兒工作的林鈺洧，醒覺到要多元化發展。

直腸直肚 咬破酒杯

做慣模特兒的Denice，人前是美女，人後卻是另一個模樣，她笑言自己私底下沒形象、沒架子和沒包袱，自爆試過一次喝醉酒，竟用牙咬爛了酒杯，嘴唇沒有受傷已經是萬幸：「我唔會刻意去掩蓋我嘅情緒，鍾意就鍾意囉，啲人可能覺得我嘅缺點係太直腸直肚，乜嘢都擺晒喺塊面，我都會收斂嘅，但如果我唔鍾意你，你一定會知道，掩飾唔到。」

林鈺洧努力尋找演出機會，也拍過電視節目。	林鈺洧與母親感情親厚，經常像姊妹般行街Shopping。	經歷過感情創傷，林鈺洧歸咎自己太黐身。

直腸直肚、喜歡便喜歡的個性，對感情亦如是，她說每次拍拖，喜歡一個人，便會全情投入，會變成黐身女友，現在回帶看當日的自己，也覺得討厭，她說：「唔鍾意以前嘅自己，我覺得就算你跟住個男仔，頭幾個月可能幾sweet，幾咁鍾意，但都要畀番空間佢，咁個男仔先會鍾意你多啲囉，唔可以太黐身。尤其我個人經驗，我以前讀書年代嘅男朋友，我黐身到跟埋佢去大學上堂，日日都要喺佢屋企瞓，唔肯走，所以佢同我分手，就係因為太黐身，我先吸取咗教訓，以後唔黐男人。」

感情失敗 學懂放手

作為時下女性，要的不是男人，不是父蔭，Denice經歷過失敗，才看得通這個世界，她說：「我覺得女仔一定要有自己事業，如果只係做模特兒冇其他事業，有時真係唔夠使o架嘛，要工作，唔可以靠爹哋媽咪，或者依賴男朋友。其實每個女仔一定要有自己鍾意嘅嘢做，發展自己嘅事業，咁先有得選擇。」她笑言自己經歷兩次黐身女友的失敗經驗，才學懂放手，更想開YouTube分享失敗感情。