林小美唔怕蝕底三點式「伴遊」

Cherry減足10磅，罕有性感大解放。

身為日本達人的Cherry早前遠赴當地為旅遊書取景，換上和服及校服等多個造型。向來密實的她更豁出去，激罕以火辣三點式示人，展現驕人身材。她坦言為着三點式努力搣脂：「兩個禮拜前開始狂做運動，每日做足3個鐘，加上唔食澱粉質，以蔬果為主，最後減咗10磅先敢塞入去件泳衣度。」

性感相刺激銷量

問她拍水着照可有意推出寫真集？她直言未有此打算：「我嘅身材唔算好，加上見到酒店有個靚泳池，所以先影三點式留倩影。未來繼續以旅遊書同相集嘅形式出書，如果今次銷量理想，下本書嘅造型會再突破啲，分享更多性感靚相。」

碌爆人情卡

雖然今次只得數張性感照，但Cherry並不擔心銷量，因她碌爆人情卡搵贊助，未開賣已封「蝕本門」，相當厲害，她說：「我一手一腳搵晒機票、酒店及服裝等贊助，攝影師都收我友情價，好多謝大家咁幫手。依家新書暫時印咗2,000本，贊助加埋網上預購已經回到本。」

Cherry於新書中有性感靚相。	Cherry介紹日本旅遊，當然要着傳統和服。	Cherry出動校服誘惑。