鍾晴「憎狗論」捱轟知衰道歉

兒童節目《Think Big天地》主持鍾晴在節目上一番「憎狗論」,引起愛狗人士激烈反響,並在她的社交網留言圍剿!知衰的她即時認錯,承認口不擇言及用詞不當,揚言日後不會再犯。

日前,鍾晴(Karlie)為無綫節目《兄弟幫》擔任嘉賓,講到有次到工廠區開工遇到大狗的經歷,言談間運用了針對性字眼:「工廠區啲狗特別……毛茸茸同好污糟,即係好……好乞人憎嗰啲呢!」即時辣着一班愛犬之人,除了網上發文狂轟外,還在她的Facebook留言圍插,斥責說話冷血冇腦及不懂得尊重動物,沒有資格做兒童節目主持。對於其「憎狗論」,通訊事務管理局收到50宗相關投訴,而無綫亦接獲50個觀眾提供意見,當中部分是投訴。

解釋小時候被咬留陰影

成為眾矢之的,Karlie昨日在Facebook上留言道歉,稱言論不成熟及欠社會責任,日後會慎言慎行。她接受電話訪問時坦言沒有想過言論引發爭議,解釋由於小時候曾被狗咬留陰影,故在節目上講到狗的話題時較激動,澄清自己只是怕狗,並非歧視或憎恨,但承認將狗形容為「乞人憎」是用詞不當:「我冇經思考就衝口而出講咗,我以後會小心用字,對唔住愛狗之人,令到佢哋覺得唔舒服。(覺得你教壞細路?)嗰日錄節目太輕鬆,現場又冇小朋友在場,有少少口不擇言。(話你冇腦?)我係冇修飾啲用詞,下次講嘢會圓滑啲。」

問到被圍插會否覺得好慘?Karlie表示沒有這感覺:「事出必有因,係我講嘢令佢哋唔舒服,冇顧及佢哋感受。我睇晒所有留言,以後會收斂言行,唔會再犯同樣嘅錯。」又指經常忘記藝人身份,日後會警惕自己每句說話都會影響到人,今次當上了一課。

至於曾擔任兒童節目主持的余德丞感同身受,坦言包袱大:「係應該做小朋友嘅榜樣,鬧人同打交都唔提得,好多嘢都唔講得。就算去到其他組做嘢,例如劇組角色,演壞人嗰啲都唔可以接。」