黃倩婷多得「陪月」極速瘦25磅
名媛諸葛紫岐旗下藝人黃倩婷五月中開刀誕7磅8安士重的囝囝，日前一家三日到影樓影全家福，她透露本計劃半身麻醉，但因太緊張，剖腹時感到痛楚，醫生惟有建議全身麻醉，一心陪產的老公只可在外等候：「老公等咗差唔多一個鐘，佢話好擔心，時間過得好慢，以為我會死，直至見到我出嚟先安心。」
新手媽媽黃倩婷大呻湊仔辛苦：「我哋咩都唔識，雖然有請陪月幫手，但佢好唔得，搞到我哋冇覺好瞓，成日睇實BB，驚佢照顧得唔好，之後換咗第二個陪月好好多，我可以休息多啲，但都多謝第一個陪月，因為辛苦，令我瘦得好快，之前重咗30磅，生完一個月瘦番25磅。」她又大讚老公無論換片或餵奶都做得比她好，令她可安心休息。