米雪蕩失路錯過影威水相

藝人米雪與苗僑偉昨日齊齊現身馬場，支持有份的愛駒「蟲草之星」出賽，還贏得處女勝利！可惜的是米雪因迷路關係，未能與苗僑偉一起拉頭馬拍照，但她未有因而不快，依然笑不攏嘴兼直豎拇指，心情相當興奮。她接受本報訪問時表示為最終賠率只有3.3倍的愛駒勝出而感高興，又讚苗僑偉眼光獨到：「啱啱上咗去睇，落嚟嗰陣又有Fans搵我影相，所以遲咗落嚟啊！苗僑偉好有經驗，佢一早就預咗會贏，結果真係贏咗！」