玩都唔願郁！黃婉曼驚女兒成長慢

久未亮相幕前的黃婉曼（Icy）昨日到荃灣出席頒獎禮，講到女兒快將一歲，讚她性格斯文，但成長速度偏慢：「帶佢去Playgroup，見到好玩嘅嘢佢都唔會飛撲過去，唔多願郁！可能要觀察一輪，但就安全冇咁易整親。（識講嘢未？）未呀！期待緊嗌媽媽定爸爸先。（想栽培佢做咩？）冇呀！佢啱啱出世時身體差啲啲，健康已經係最重要。我有時想教佢英文，老公就只係齋玩，所以佢特別鍾意爸爸，咁我都欣賞咁，小朋友應該無憂無慮。（再追小朋友？）追幾個都得！我鍾意小朋友，但順其自然。」又透露最近忙於麵包學校生意，將歐遊拍攝麵包節目，不捨得跟愛女分開兩星期。