馬國明出口術幫女友（抓）拍續集

熱播劇《宮心計2深宮計》一眾演員昨晚齊集與觀眾睇結局，有傳將開拍第三輯，各演員不忘獻計，馬國明望以全新故事與心穎再續片緣；胡定欣則被對白難倒，笑言要植入晶片才能再演舞台劇版！

藝人馬國明、黃心穎、胡定欣、馬浚偉、陳煒與羅霖等，昨晚到鑽石山出席「深宮結局齊齊睇」活動，與觀眾欣賞大結局，演員們還在管弦樂團伴奏下唱主題曲，相當熱鬧！

胡定欣太奸想煎巴自己

姍姍來遲的馬國明到場後即「自動波」走到女友黃心穎身邊，被拍檔蕭正楠取笑：「一嚟到就知企邊喇！我哋喺嚟宣傳，唔係嚟拍拖！」有指馬國明與陳煒被總監製梅小青欽點開拍第三集，他希望會是全新故事，有機會再與心穎結片緣：「睇安排喇！我哋呢一對反應太好，下一輯有冇辦法超越就要交畀小青姐去諗。」陳煒則表示如有續集會接受考驗，但就要有部署做得更好，問到獲點名讚不嫌辛苦？她笑說：「嫌o架！不過呢個係入行22年培養出嚟，每個人都專業，大家齊心合力拍好部劇，我係公司藝員，要度期好易！」並寄望新一輯有更多感情線：「希望都係駙馬（曾偉權）啦！今次對佢太衰，要畀番啲愛情滋潤佢！」

胡定欣與馬浚偉則表示未收到開拍劇集的消息，定欣說：「套劇口碑好好，內地點擊都有30幾億，相信小青姐要花好多時間雕琢劇本，或者開一套喜劇版。」馬浚偉指有人提議開舞台劇版，但直認難度高，定欣聞言笑說：「真係嘅話要植入晶片先得，邊記得到咁多對白！（演奸角畀街坊鬧？）由最初個高低眉妝到滑胎後都畀人鬧，但結局又令大家改觀，真係對我又愛又恨，所以觀眾想『煎巴』我係啱，我都想煎巴自己。」