周美鳳護女蔡欣熹感動

名媛周美鳳女兒蔡欣熹創立自家珠寶品牌兼任設計師,早前更獲著名珠寶店邀請Crossover婚戒系列,女兒有此成績,周美鳳大感欣慰。母女感情要好,但亦會嗌交,不過蔡欣熹一樣視媽咪為偶像:「佢人品好做嘢叻,但就好急好快,我反而跟唔上佢嘅節奏!」

小時候媽咪曾為保護她而破口大罵,令蔡欣熹十分感動:「我有弱視,為矯視要戴住個眼罩,好似海盜咁,畀啲小朋友笑。有次媽咪同我等過馬路,有個媽咪拖住個小男孩經過,個男仔指住我話:『呢個女仔做咩事,快啲走開。』媽咪聽到就即刻鬧佢冇禮貌,覺得歧視我,佢咁保護我,嗰刻我好感動!」