男友4卡鑽戒求婚湛琪清嚇呆大嗌 No!
「宇宙最強」甄子丹太太汪詩詩的表妹湛琪清（Jessica），昨日手戴4卡鑽戒在港出席護膚品牌活動，透露兩個月前到峇里旅行時，獲男友金承威驚喜求婚，她說：「佢訂咗個地方畀我歎Cocktails，送上第二杯時附上一個戒指盒，我即時大嗌『NO！』，因為我又冇乜化妝又冇Set頭，唔想咁嘅樣接受求婚。」不過冷靜後的她即刻答應，感動到爆喊。Jessica指已同男友訂婚，但想先享受二人世界，故暫未計劃婚禮。
此外，即將下嫁商人兼賽車手陸漢洋的苟芸慧，透露10月在香港擺酒，婚紗設計頗為性感，姊妹團方面她打算找「處女黨」前成員岑麗香、鍾嘉欣、王君馨、李亞男及兩位台灣朋友，並笑言：「嘉欣佗緊BB，到時睇情況。」至於同場的歌手江若琳，透露與男友蕭潤邦的婚禮年底舉行：「佢恐嚇設計師，話如果婚紗太Sexy佢會全程黑面，仲話到時會攞定西裝褸笠住我。」
