秦沛任子女承衣鉢：條路會仲難行

昨日74歲生日的秦沛，演齡長達70載，首次參演舞台劇的他直言對記性最有信心：「趁依家記性仲OK，點都要試番次啦！」他表示近年有寫筆記的習慣：「始終都有啲年紀，趁仲記得一醒起咪寫低先。（考慮集結成書？）寫到幾多得幾多，仔女早排返加拿大都有幫我執啲相。」

每次演出都有印象

多年來演過大小角色，秦沛對每次演出都有印象：「今次演律師，同以前演律師好唔同，每個角色都唔一樣，有後生仔問過我點去演戲，我就話要把握機會，要放個心落去做，你唔用心做又點會記得呢？」問到子女姜文杰及姜麗文入行時，是否同樣語重心長？他說：「當時只係講咗一句『做呢行預咗辛苦』，就睇佢哋做唔做囉。」

「演藝世家」成負擔？

秦沛當年與梁盛子離婚後為子女的生活奔波，三父子相依為命，直至遇上現任太太為他照顧子女，他為專心拍戲養家而與家人分隔兩地，但親子關係沒有疏離，到子女「承家業」要加入娛圈，外界形容一副嚴父形象的他是子女的最大難關，他笑說：「冇得唔畀，當年佢祖父母都係做呢行養大我哋，到今日我做呢行養大佢，之後嘅路由佢哋選擇。我哋都算係演藝世家，但講明咁樣唔會幫到佢哋，反而條路會更難行，但佢哋年輕人想追求夢想，我當然支持。」

場地：Dada Bar+Lounge＠The Luxe Manor