祖兒唔急嫁未准師兄「入屋」
容祖兒與劉浩龍（師兄）關係撲朔迷離，雖然兩人被目擊撐枱腳似乎正式翻撻，但她昨日受訪時卻繼續不置可否，而且未准師兄「入屋」，只說他是「朋友」，看來師兄仍需努力！
天后容祖兒與劉浩龍今年3月被爆分手，但一直保持友好關係，4月她更力撐對方開騷，直至日前本報影到師兄與祖兒食飯補祝生日，再傳翻撻成功，但亦有指他們從未「甩拖」。對於耐人尋味的關係，祖兒昨日到電台宣傳新歌《心之科學》時，繼續不承認亦不否認，並謂大家怎樣寫都可以：「呢個階段你哋任何評論、揣測都係好開放，但我自己心裏有數，大家唔使咁擔心或關心嘅。」
新歌唱出分手
問到他們現時是好朋友還是情侶？她只說：「除非有一日會成為家人，其他人都係朋友。（即係佢仲未係你家人？）好明顯佢唔係我家人。」但她坦言間中都會見面。講到日前與師兄等朋友遊船河慶生，她笑說：「同成班好朋友一齊，遊船河大家唔化妝，所以嗰度都係最熟、信任嘅朋友嚟嘅。」講到生日願望，她希望媽媽身體健康，問到可會想快些嫁人？她說：「未喎！（你之前唔係話想40歲前結婚？）依家38咋嘛，呢啲好難講，唔好畀時限框住自己，特別係我呢啲留前鬥後。」
至於新歌，較少唱Pop Rock的她表示本身都擔心，但意外地很多歌迷都大表喜歡。提到歌詞是講分手，她表示自己是演繹者，填詞人是黃偉文：「我哋事前冇溝通，我將佢想講嘅訊息傳遞出嚟。」