Eason3封金曲歌王 徐濠縈斬叉燒行Catwalk
歌手陳奕迅（Eason）前晚在台灣《第29屆金曲獎》奪得「最佳國語男歌手獎」3度封王，新出爐雙料「歌王」昨日甫返港即開香檳，兼有愛妻徐濠縈（阿徐）大晒玉背落街買叉燒，為老公炮製「住家飯」慶祝。
Eason昨晚飛返香港心情靚爆，更獲歌迷送上香檳慶祝。對奪「年度專輯獎」及3度獲歌王寶座，Eason稱只有兩次親自上台攞「歌王」獎，他說：「係好開心、好難得嘅。」在宣布得獎時，他是好愕然來不及反應，因冇想過獲獎：「前幾日都有問過經理人，如果攞獎有啲咩致詞等我組織吓，佢話覺得我今年機會唔大，咁就仲好啦唔使準備，冇諗過最尾拎咗！」
徐佳瑩首奪女歌手獎
至於Eason和首奪「最佳國語女歌手獎」的徐佳瑩，在大會評審團的19票中，分別得14票及11票，更在首輪投票中已勝出當選。
問到可會開演唱會報答歌迷？Eason認真表示：「呢個喺香港講要小心啲，曾經講過話最快2019年開騷，大家就以為2019年一定開騷，自己係想做好啲準備先，而且紅館申請檔期都好難。」並指張學友用半年時間，便做了超過135場巡唱。問到是否有意與學友紀錄睇齊？他說：「冇咁必要，學友太犀利，做咁多場體能要好好。」
至於Eason老婆徐濠縈，昨日在IG上載一張以吊帶露背裝造型在燒味舖「加餸」相片，並留言「＃斬料斬大嚿叉燒＃賀賀佢」。問到Eason是否趕回家慶祝？他笑言：「睇咗IG見老婆『斬咗料』，唔知係咪賀我，或者賀個女考完試放假呢？（住家飯溫馨啲？）我成日都返屋企食飯，喺屋企最舒服。」
公眾場合收斂脾氣
此外，前晚Eason出席金曲獎慶功宴時，重提在俄羅斯睇世界盃憤怒舉中指一事，他說：「係對方挑釁我先，我唔明點解對方要咁做，當時係忍唔住，下次會聰明啲，拎手機影低個情況，大家就知我面對緊乜嘢。」而Eason亦承認舉中指不當：「唔應該喺公眾場合咁做，作為公眾人物要諗多啲，唔應該發脾氣。」