任賢齊似有身紀 大小情人嫌棄唔拖
最近為新戲積極增肥的任賢齊，日前化身廿四孝爸爸，挺「巨肚」陪老婆仔女去中環Shopping。身形脹爆的他走路時以肚腩行先，步姿似足「大肚婆」，身旁的女兒亦不敢埋身！
向來身形健碩的任賢齊，為新戲的大肥佬角色，每日食足六餐增磅，努力狂食的他，4月出席活動時，體重已增逾20磅，並自言是有史以來最肥，行路會磨大髀，為角色犧牲搞到身體血糖和血脂偏高，更笑言被太太嫌棄大肚腩。
日前下午，戴帽及眼鏡的小齊與太太Tina及一對子女現身中環行街，當日以全黑打扮上陣的他，身形明顯繼續膨脹，肚腩大到如懷有8、9個月身孕的大肚婆，就連步姿都似到十足，肚腩行先，目測現時體重已超過二百磅。
囡囡樣子清秀
一家四口步往該處一間時裝店，見小齊主要陪太太及女兒Rati睇衫，13歲的Rati長得亭亭玉立，樣子十分清秀，遺傳父母的優良血統，身高已到爸爸耳仔。逗留約半小時，買完衫的小齊孖女兒先步出，而10歲的兒子Cody緊隨其後，但好動活潑的他顧住在樓梯跳跳紮唔願走，最終要殿後的媽咪上前喝止才乖乖下來。其後Tina負責拖着囝囝離開，而女兒則與爸爸並排而行，但卻沒有拖實爸爸，莫非連小情人都嫌棄小齊肥？
另外，昨日生日的小齊在社交網上載一張電單車照片，自言是送給自己的生日禮物，並留言：「多謝大家的生日祝福！整個六月好像都在慶生，切了不知道幾個蛋糕。大家費心了，真不好意思！希望大家都健康平安快樂！日日安心天天幸福！給我自己的生日禮物。」如今體重直線上升，睇怕他早已肥過部電單車！