沙律黐實男友睇波增情趣

世界盃正式開鑼,四位運動型靚女「沙律」張沛樂、趙詠瑤、羅伊婷及彭美詩換上球衣落場鬥波,有另一半的表示會拍住拖睇波,單身的則落Bar識男仔。講到今晚深夜西班牙對葡萄牙「雙牙」大戰,四女各有偏好,Friend都冇情講!

深得網友歡迎的索女「沙律」張沛樂、趙詠瑤(Kimi)、ViuTV選美冠軍羅伊婷(Daisy)及世界旅遊小姐香港代表彭美詩(Mercedes)趁世界盃殺到,換上波衫短褲踢波湊熱鬧。對足球最有研究的Kimi睇好上屆冠軍德國,但亦支持最多小鮮肉的法國,Mercedes則笑言當然會支持跟她「同名」的阿根廷球星美斯,而沙律力撐大熱巴西隊,Daisy則睇好西班牙。

落Bar搵艷遇

講到今晚深夜西班牙對葡萄牙「雙牙」大戰,Kimi知西班牙會全力盯死C朗,而且分組賽大家都以不失分為大前提,相信賽果是零比零。沙律則認為C朗熟習西班牙球員踢法,葡萄牙會小勝。本身有西班牙血統的Mercedes直言一定會偏心,相信愛隊會打入決賽。

世界盃踢足一個月,Mercedes表示會約好友睇波感受熱鬧氣氛,沙律亦指不擔心被男友丟低:「我本身都男仔頭又鍾意運動,會跟埋一齊,而且想同另一半有共同興趣。」Kimi自稱比老公對足球更狂熱,並提議靠睇波增加情趣:「無論識唔識波都好,各自支持一隊,輸咗嗰個就要買嘢畀對方。」單身的Daisy過去兩名男友都是足球迷,令她增長運動知識,希望下任男友都是運動型,三女即笑言會約她落Bar睇波介紹男士給她認識,令Daisy尷尬傻笑。

場地:車路士足球學校(香港)