歌手許志安昨日出席防止電話騙案宣傳活動，自認不易受騙的他，早幾日有個不明來歷電話亦拒絕接聽，不過他試過被人呃過買假波鞋，他說：「十幾年前急住買波鞋，畀人呃過，着落似拖鞋。（組合BIG FOUR有冇畀人呃過？）張衞健、梁漢文同蘇永康嘅缺點就係容易受騙，所以今次活動只搵我嚟，冇搵佢哋。有時約佢哋動機係呃食飯，同佢哋講出嚟傾心事，埋單時我講得再痛苦啲，佢哋找完數我就笑番。」7月他會隨明星足球隊到俄羅斯睇世界盃。
