松松遇蟲蟲特攻 陳煒：世界末日咁！
再為無綫拍劇的陳松伶（松松）為新劇拍攝時難忍被蟻咬，講對白時忍不住驚叫，拍檔黃智賢笑言只要多拍劇就能免疫。陳煒亦戥松松辛苦，提到有份主演的劇集反應好，她預告若有20億點擊就有驚喜！
藝人陳松伶、陳煒、黃智賢、徐榮、楊卓娜與莊思明等，前晚到佐敦出席新劇《危城First Lady》煞科飯局，松松與已離開劇組一個月的好姊妹陳煒重聚，姊妹情深的她們即場咀嘴，松松笑言：「呢張相老公冇得呷醋！」
畀蟻咬痕足一星期
松松指劇中演員與幕後都拍得辛苦，值得一座「傑出員工獎」，又自爆拍劇頻頻受傷：「隻腳係咁畀蟻咬，我手指插到木刺都可以忍住繼續講對白，但畀蟻咬時真係忍唔住叫咗出嚟！啲蟻真係好惡，我隻腳痕足一星期，有同事直情係咬到腫咗加發燒！」她透露有皮膚敏感及眼睛發炎，被拍檔黃智賢寸爆：「佢話拍多啲劇就可以免疫！（怕咗拍劇？）唔驚，小事嚟，拍完抖吓咪又一條好漢，同班好同事合作係福氣。（抖幾耐？）之後要去北京做表演，或者可以請同事嚟睇。」
戥拍檔日曬雨淋辛苦
陳煒亦戥一眾拍檔辛苦，她說：「今晚特登趕嚟食飯，我哋有個群組，自己拍緊時裝戲，但見到一班拍檔仲係好天曬落雨淋，好戥佢哋辛苦！」又指拍劇時被漫天飛蟻嚇親：「見到成千上萬飛蟻喺度飛，好似世界末日咁！」提到主演的熱播劇《宮心計2深宮計》收視報捷，點擊接近11億，問會否晒相慶祝？她笑說：「等20億我拎啲嘢出嚟畀大家開心吓！」