囡囡上台送肉嘴 Paul冧爆變鵪鶉

Paul與5歲愛女嘴對嘴錫錫，父愛滿瀉。

紅館一連兩場《搖滾大俠奏HKBAND演唱會》前晚圓滿結束，尾場睇騷的嘉賓不單星光熠熠，更「兒孫滿堂」，Danny Summer的孫仔、Paul的愛妻朱茵拖實身穿花花連身裙的5歲囡囡黃鶯（叉燒包）坐於台下欣賞。五子出盡全力獻技炒熱氣氛，台下更有不少觀眾由開騷「Un」到完騷，全場熱血沸騰！

Encore環節，叉燒包上台獻花為全晚帶來高潮，台下觀眾拍手起哄！Paul接過花後跪低抱着愛女，以溫柔的聲線兼甜笑望住她說：「多謝你嚟撐爸爸。」又指住叉燒包笑說「我老細」，並鼓勵她開口打招呼，父女之後更嘴對嘴錫錫，令身旁的豹哥酸爆：「冧晒啦，見到你鐵漢柔情，喺個女面前鵪鶉咁，有遺傳果然唔怯場。」

丘亞葵大讚今次Band騷，令人熱血沸騰！

Joey奮身演出跌落地下，要由Paul出手扶起。

朱茵右眼爆紅

騷後五子於慶功宴上受訪，大呻意猶未盡。重提叉燒包上台一事，Paul即化身「緊張爸爸」：「其實都驚o架，下面咁多人，點知佢唔驚，平時佢都好鍾意玩樂器。」他續大爆愛女厚面皮，經常自薦參加活動，又提到太太朱茵由美國趕返港撐場，她右眼爆微絲血管，半邊眼白爆紅，未知是否疲勞過度有關。

至於自稱好憎唱歌的豹哥，竟「破處」與太太胡蓓蔚上台合唱，並發表「愛的宣言」：「佢應得一個機會企喺紅館表演，唔想人哋忘記佢係一個好好嘅歌手。」問到Jun為何沒有邀請女友林憶蓮合唱？他表示憶蓮正放假陪女兒，又寫包單話：「如果再搞呢個騷，就絕對要佢上台。」