方中信結婚10周年遇愛犬病逝愁

方中信與莫可欣夫婦風雨同路10載，大前晚愛犬Bijoux突然不適，方中信連夜送牠往獸醫診所留醫，證實心臟有問題，至翌日情況惡化離世。一屋女人包括可欣、囡囡迦晴及嫲嫲聞訊全部爆喊，方中信心情亦相當沉重，但由於早已邀約友人包括曹永廉、蕭正楠、黃翠如及鮑起靜夫婦等，他處理愛犬身後事後，隨即與家人驅車往尖沙咀一間六星級酒店，會合親朋食飯「散心」。

遊意大利氹番老婆

方中信昨日接受電話訪問坦言：「結婚咁耐，今年結婚周年真係最難忘喇。尋日一知Bijoux唔係好妥，我哋仲去學校湊埋迦晴放學，大家去見佢最後一面。（再養番隻？）依家屋企仲有一隻，短期內都唔好搞住喇。（送乜畀太太？）冇呀，但嚟緊佢會返去瑞士探親，我就飛去意大利會合佢，大家一齊玩吓囉。」

可欣心情久久未能平復，昨日聲音明顯沙啞：「尋日有好多事，又打風、Bijoux又突然出事，我哋即刻要做一啲決定，個腦實到乜都諗唔到。好感激一班好朋友嘅陪伴，冇咗佢哋嘅話，我諗我哋只會匿喺屋企喊。」她更指Bijoux當年曾陪方中信拍攝手錶廣告，感情深厚。

迦晴與愛犬感情要好，對於狗狗逝世，當然傷心不已。	方中信和莫可欣邀請好友吳家樂、曹永廉、蕭正楠、黃翠如等出席派對。	蕭正楠和黃翠如拍拖赴會。

幾杯到肚呆坐一角

據悉，方中信在派對上「幾杯到肚」，即坐在一角發呆，教人心酸。好友曹永廉坦言：「我本身都有養狗，但估唔到佢錫狗錫到咁嘅地步……（送乜畀方中信夫婦？）我送咗個佛像，希望喜歡啦。」

而方中信囡囡迦晴今天10歲生日，前晚派對上，方中信及可欣準備了蛋糕為囡囡提前慶生，並拍下全家福，方中信昨日上載到微博分享，並留言多謝大家祝福。