睇隔籬台捧世盃？李佳芯醒目：出街睇！

李佳芯鍾意睇波，但唔會揀靚仔至捧場。

藝人李佳芯（Ali）與歌手林師傑昨出席在商場舉行的足球活動，Ali穿短褲騷長腿，甚為吸睛，現場兩人互射龍門，林師傑接Ali踢出的超慢地波，打了個觔斗才接到，十分搞笑。Ali表示世界盃是全球盛事一定會睇，對於世盃在ViuTV及Now TV播，轉數快的她說：「咁喺街都有機會睇到，商場都好似會播，同埋睇波唔一定屋企睇，多人睇仲開心。」

林師傑睇波當開P

Ali最愛英格蘭，可惜喜歡的球星都退了役，問到捧球星是揀靚仔還是好波？她抵死地說：「你覺得我鍾意睇靚仔咩？我覺得才華同外貌都要平衡，最好每樣有啲。」十足講緊電視主持男友陳炳銓！至於男友捧哪隊球隊，Ali表示沒有問，又說沒有為睇波而鬧交：「要鬧太多嘢可以鬧，唔會為波鬧交，自己唔鍾意喺酒吧睇波，太嘈，都會同朋友賭吓牙骹戰，賭錢就唔會。」

將於年底結婚的林師傑，揚言睇波當作開單身派對，最難忘18歲在新加坡服兵役時，在營內聽收音機播世盃。

守龍門的李佳芯成功接球，笑到見牙唔見眼。	林師傑主持開球禮。	林師傑過兩招畀Ali，教佢「守龍」。