馬浚偉等破10億準備裸威

藝人胡定欣、馬浚偉、黃心穎、謝雪心等昨日於香港仔出席無綫劇集《宮心計2深宮計》宣傳活動，唱歌、跳舞與長者同樂。活動上更公布內地播放量已達9.3億，正向10億邁進，而首周「七天跨平台總收視」獲27.8點，是今年首周收視之冠。

胡定欣考慮晒舊相

主角馬浚偉與胡定欣之前許下承諾，指香港收視達30點就公開二人的床照，席間二人對收視充滿信心，更指內地播放量今日會突破10億！馬浚偉說：「呢兩晚劇情都幾慘痛，好虐心，呢兩日天氣唔好，大家留喺屋企睇電視唔好出街啦！」馬浚偉亦表示已為10億播放量準備定半裸及全裸照，他笑說：「我想晒全裸多啲，不過張相好似未夠一歲，用鴨仔遮住咗重要部位！」定欣聞言亦表示考慮翻翻舊照，為20億作準備。

另外，提到好友林燕妮辭世，馬浚偉表示會送別好友：「我哋啲基督徒，對死亡有另一套睇法，大家終會喺天家相會，所以唔會太傷感。佢離開之前我哋有見過面，大家傾咗成個鐘，佢當時依然紅粉菲菲，我哋相識超過廿年，我一直叫佢『貴族』，佢就叫我浚偉。」

黃心穎為長者表演，大騷舞功。	馬浚偉與謝雪心大跳貼身舞。	黃心穎受訪時工人褲忽然甩扣，即笑住閃人。

刻意令男友變男神

而心穎做訪問期間，工人褲忽然甩扣，狼狽爆笑地跑回後台扣上。講到與男友馬國明在劇中有感情戲，心穎笑言：「喺劇入面我都算係佢頭號粉絲，見親佢會心心眼，幾瘋癲，不過現實中我未到頭號，嚟緊講我畀佢拒絕。（現實中都曾畀佢拒絕？）冇乜，現實邊有咁誇張，我都刻意做多咗畀佢，等佢可以變男神！」更不諱言拍此劇令二人感情更好。