吳卓羲（Ron）離開工作超過20年的無綫後，近年轉攻拍電影，他自覺仍是大銀幕的新人，希望可以再創出另一番事業。將近40歲的他依然未有伴，他以「一片空白」來形容感情生活，不過眼見身邊好友相繼結婚，也有成家立室的念頭，但要先有家庭才計劃生育。

闊別螢幕兩年多的吳卓羲，於邵氏網劇《飛虎之潛行極戰》中，與黃宗澤（Bosco）做一對同父異母的兄弟。飾演有組織罪案及三合會調查科探員的Ron，雖然今次未有機會與一眾型男鬥「肌」，但他未感失望：「冇所謂，有得騷肌咪操吓，冇得騷咪跑吓。」

雖然大部分戲份都不用穿上飛虎制服，表面上比一班飛虎隊員較輕鬆，但Ron有苦自己知，在炎熱天氣下有不少動作場面，受傷無可避免：「飛虎隊出動之前我要查案捉賊，一個人打晒，仲有槍戰，又要跳樓梯，都好辛苦。」

繼《衝上雲霄》及《英雄．刀．少年》後，Ron與Bosco先後離開無綫，今次是二人相隔十多年後再次合作，Ron以「得意」來形容重聚的感受：「咁多年冇合作，大家都經歷咗一啲拍戲同待人處事嘅經驗，再返嚟拍同以前係唔一樣，因為兩個都大個咗。」他指大家都演過很多不同角色，揣摩和拿捏角色的角度和手法都有別過往。

Ron於無綫工作超過20年，最後一部劇集是2015年播出的《梟雄》，他直言喜歡演戲：「我覺得離開咗之後睇嘢同做嘢唔同咗，眼界可能闊咗。以前我喺無綫嘅時間，係拍劇之餘，可能會拍其他綜藝節目，但喺內地拍電視劇可以專注啲，唔使諗太多嘢，又唔會悶。」

今次「回巢」拍劇，Ron解釋是因為劇本及對手夠吸引，連苗僑偉（三哥）也有份找他參演：「佢話不如玩多部，我諗諗同Bosco好似咁多年冇合作，我哋大家唔使埋位時，坐低傾偈又幾開心。」雖然今次與另一型男張兆輝戲份不多，但Ron與對方合作感到開心，又透露張兆輝很多時都給他發揮空間，最緊要大家拍得舒服。《飛虎》早前於myTV SUPER及內地視頻網站率先播放，點擊成績甚佳。問到可會繼續在香港拍劇？Ron說：「香港始終有個家，我覺得一個演員喺唔同地方要去接觸唔同嘢，先可以吸收更多。」

近年主力於電影大展拳腳，Ron直言想在銀幕上創一番事業：「當然想試吓，無綫係一個磨練嘅地方，我都留咗喺無綫咁耐，拍咗咁多劇，試吓跳出去做唔同工作，試吓喺大銀幕出到嚟個效果會係點，大銀幕上我係新人，所以要學吓嘢。」

不少電視藝人轉戰影圈均取得輝煌成績，Ron亦視前輩周潤發、張家輝、古天樂、林家棟為目標。他有信心隨着時間過去，必定能搣甩電視味。稍後他會與周麗淇合作，是他於銀幕上的首部愛情電影。

講到感情生活，Ron笑言一片空白：「邊有時間拍拖呀！（有乜擇偶條件？）最緊要有共同嗜好，我都38歲，另一半年紀都要恰到好處。」他笑指家人未有催他結婚，反而母親有催他生仔：「最近有諗過結婚，因為見到好多朋友結婚生仔都好開心，但暫時我冇時間去拍拖，我又唔想淨係生仔。我想有家庭，所以要等吓。」

文：影視組

攝：張福宏

化妝：Marsha Ma