Oscar送兩卡鑽戒 攬江若琳放閃
昨日5月20日是攞正牌放閃的日子，除周汶錡與老公、莊思明與楊明等盡情晒恩愛外，準新郎蕭潤邦亦為未婚妻江若琳炮製婚前驚喜，任揀20萬鑽飾。而戴上兩卡鑽戒的江若琳以行動代替講話，當眾與男友「攬埋一舊」之餘，更錫錫面珠，放閃度勁過全場鑽飾。
「生煎包王」蕭潤邦（Oscar）與未婚妻江若琳（Elanne）將於12月23日拉埋天窗，並正積極籌備婚禮，趁巧在520（寓意「我愛你」）的放閃日子，被撞破煙韌揀婚戒。Oscar與身穿露肩上衣的Elanne着情侶裝爛牛仔褲，現身銅鑼灣街頭，男方更搭住Elanne膊頭，如連體嬰般步入一間鑽飾店內。
拉拉扯扯玩推手
兩人甫入店就孖住四圍睇鑽飾，期間見Elanne不時冧笑，似乎被Oscar的甜言蜜語氹得開心不而。期間兩人停在鑽戒櫃前，雙眼被鑽石吸引的Elanne，突然被Oscar一擁入懷嚇了一跳，即時還拖玩推手，但Oscar實在禁不住戀火，一手撳住Elanne的嘴要咀嘴，一時又肉緊地鍊住Elanne條頸，在旁若無人下玩到扭作一團，連Sales也睇到眼金金。最後兩人終於選中心水戒指及試戴，Elanne看見手上的鑽戒閃閃發光即笑到嘴角含春，之後還為手上的鑽戒影相。而Oscar在店內簽字後，兩人又拿起一張紙合照就埋單拎袋走人。
當Elanne發現被追訪時即尷尬大笑，但仍大方透露此行是買婚戒，Oscar坦言：「我揀咗個Design，呢度就幫我造咗一隻呢個Design嘅戒指。（你自己設計？）我大概知佢想要啲咩，其實都唔係設計，係網上睇下，大概感覺係點。」他透露鑽戒價值6位數，有2卡，Elanne即笑言：「但我唔介意每年加1卡。」但據知其實兩人除買了一對5位數鑽石婚戒外，Oscar還多買了6位數的2卡鑽戒作「520禮物」，共花費逾20萬。
兄弟姊妹團未定
問Oscar為何在店內簽字？他解釋因他所買的新郎戒指一生人只可在店內選購一次，Elanne亦笑言：「如果佢要買第二隻就要過主啦。」Oscar即出手撳住Elanne的嘴，當眾在街頭耍花槍。問到婚禮籌備情況，兩人表示搵兄弟姊妹團較複雜，而婚紗款式就已定，但Oscar要結婚當日才會見到，Oscar笑言：「有一Part佢嗰件婚紗淨係着畀賓客睇，唔係着畀我睇，因為驚我鬧佢。」Elanne即向他大派定心丸：「唔會嘅，咁我都尊重佢。」
文：音樂組