Sam弗到漏 阿倫豬肚湯減磅
歌神許冠傑（Sam）和樂壇校長譚詠麟（阿倫）去年首度「合體」開騷，叫好叫座，事隔1年再度回歸紅館開Part II。阿Sam早已操Fit身段準備，相反阿倫揚言繼續Keep Fat，更分享飲胡椒豬肚湯減磅秘方，日減10磅冇難度。
《阿SAM & 阿TAM HAPPY TOGETHER PART II金曲速遞演唱會》將於8月5至12日在紅館舉行，昨日舉行記者會，今次演唱會名為金曲速遞，阿Sam和阿倫以速遞員造型現身，由阿Sam結他伴奏與阿倫唱出多首金曲《世事如棋》、披頭四的《Things We Said Today》和《朋友》。阿倫稱去年只唱了阿Sam不足三分一的金曲，今次會「金曲開倉」，每晚換些不同歌曲，阿Sam更為報答歌迷支持，將舊曲填上新詞演唱。
熱到底褲盡濕
除了大唱金曲，兩人更打算騷舞技，並找來排舞師Sunny為舞功加辣，阿Sam說：「動感多啲好睇啲。」兩人可準備為演唱會Keep Fit？Sam說目標再減10磅，阿倫卻說：「佢Keep Fit，我Keep Fat。之前我返內地做戶外騷，啲汗出到底褲都濕晒，就已經冇咗6磅，之後消夜再飲咗7碗胡椒豬肚湯，跟住去埋水，冇埋4磅，咁我就足足輕咗10磅，係真o架。」
怕阻住偶像湊孫
問阿倫可將這減磅秘技傳授阿Sam？他爆阿Sam早在3個月前已Keep Fit。講到若阿Sam要求他一齊操Fit？阿倫笑言：「如果佢開口我會做o架，唔開口就算啦，大家好過啲嘛，佢係我偶像要求我做乜我都會做。」
至於會否再加場？阿倫笑言：「阿Sam夏威夷好多親戚，真係睇佢啲飛有冇畀人追到甩褲先決定。（唔開日場？）阻住阿Sam湊孫喎。」阿Sam則稱加場與否最緊要大家Happy。
文：音樂組
攝：鄭家俊