藝人李佳芯（Ali）及王浩信昨日出席健美中心開幕活動，Ali在台上玩估肌肉遊戲，用貼紙貼在健身教練身上，她笑言好似食完甜品一樣：「但唔可以食得多，間唔中一餐好Sweet。」她表示拍攝《踩過界》時，自己是唯一摸過王浩信肌肉的人。問她會否想練馬甲線？她表示時下流行蜜桃臀，都想練番個：「雖然唔知要嚟做乜，唔知畀邊個睇，但線條靚着衫會好睇。」
至於王浩信未有除衫騷肌，他笑言唔需要經常除衫，之前拍劇除得太多，又透露稍後會在新劇飾演殺手，需要操肌增磅，目標練出42吋「雞排胸」：「想身形比例上大隻番少少，但腹肌得四至六舊，始終增緊肥，呢段時間係會比較慚愧同自責。」問平時舉鐵時會否發出怪聲？他笑言會發出聲音，但叫聲較為正氣。而Ali表示行山跑步多，好少做到要嗌出聲。