千嬅以遮贈「姐」
歌手楊千嬅昨日為演唱會DVD舉行簽名會，剛由日本拍攝總監製陳寶華的無綫新劇《多功能老婆》返港的她，夜晚會跟媽咪及奶奶食飯慶祝母親節，她透露趕上飛機前才找到合適的禮物：「送同一樣嘢但唔同款，我買咗好多遮返嚟，因為個個都係『阿姐』嚟，眠乾睡濕湊大我哋，仲幫我湊埋孫，好偉大！」
讚朱晨麗醒目
她在台上與歌迷玩遊戲，又動手為兩個小妹妹梳辮仔，問到可有想過追個女？她坦白說：「有諗過，但其實仲有好多嘢可以追求，放畀個天安排，如果佢覺得楊千嬅可以有多個女，我當然Welcome（歡迎），唔係咪追求事業，繼續培養Torres，我冇壓力嘅。」千嬅笑言囝囝Torres平時畫她是畫三角形，好似巫婆：「因為囝囝鍾意《哈利波特》，好魔術好詭異，所以畫一家人都係畫三角形。」她又直言再拍電視劇不是太辛苦：「幾開心，因為一半係輕鬆喜劇。」並透露在日本跟朱晨麗對手戲較多，大讚對方活潑、開朗又聰明：「大家嘅溝通好直接同快，不過要適應拍劇嘅模式，都係一個好嘅訓練。」
文：音樂組
