外國人不時將「我愛你」掛於嘴邊，但其實真摯時刻都好含蓄，好似Man到爆的影星狄維莊遜與賴恩高斯寧等，自爆出招冧媽媽的動人故事時，粉絲都冧到狂畀Like；至於星級媽媽亦唔易做，大把「你不知道的事」！
51歲國際名模仙蒂歌羅馥（Cindy Crawford）與型男老公蘭迪（Rande Gerber）誕下一對顏值超高的仔女Presley及Kaia，貴為一代名模的她，邊開工邊打理仔女的生活，更瞓身為仔女的事業鋪路！除搵相熟設計師與Kaia合作外，她更多次與仔女齊齊拍廣告及雜誌封面，為他們谷人氣，難怪Kaia與Presley十多歲已登上國際時裝騷的天橋！
仙蒂曾在訪問中自爆，私底下與一般師奶無異：「我相信湊仔女七成都係媽咪嘅事，我屋企都係我知道晒所有學校嘅事，幫手做功課，搞活動同記住所有生日派對。我做緊呢個訪問嘅同時，都為阿仔焗緊蛋糕。」
荷里活動作男星狄維莊遜（Dwanye Johnson）不時分享與媽咪Ata Johnson的溫馨故事，出名錫媽咪的他，原來曾救阿媽一命！狄維15歲那年，媽咪被趕離寓所後患上抑鬱症，在州際公路突然落車，走向迎面而來的車輛企圖自殺，幸好狄維及時將她拉回路邊。
窮困的童年加上曾目睹媽咪企圖輕生，令狄維陷入情緒低谷，他因傷被迫結束職業美式足球員生涯兼失戀後，同樣患上抑鬱症。不過，由於與媽咪都是抑鬱症康復者，狄維學懂善待他人，提醒身陷痛苦的人並不孤單。
37歲荷里活男神賴恩高斯寧（Ryan Rosling）以迷人電眼及爆肌身形迷倒不少粉絲，原來仲有一大顆孝心！他曾自爆於2007年帶媽咪Donna出席奧斯卡時，媽咪聽朋友話Set了一個高髻，怎料坐低時擋住後排女星麗歌慧絲（Rachel Weisz）的視線：「媽咪愈跣愈低（遷就麗歌視線），我唔知點好，我只係想佢有一個開心嘅晚上，所以搵坐我旁邊嘅梅麗史翠普（Meryl Streep）幫手，同佢講：『你介唔介意同我媽咪講你好欣賞佢嘅髮型？』」賴恩指梅姨一點就明，轉身大讚Donna，仲話：「我希望我都梳一個高髻參加頒獎禮！」令Donna整晚勁開心。
44歲英國女星姬蒂碧金莎（Kate Beckinsale）早年為影星男友米高辛（Michael Sheen）誕下囡囡Lily，分手後仍不時合體湊女，出名幽默的姬蒂經常分享母女笑料，包括與愛女扮提子及士多啤梨做狂舞派！到愛女入大學，姬蒂自言變番「單身」，感覺好恐怖：「分別真係好困難，不過係好重要嘅。」講中不少媽媽的心聲！而她對媽咪都一樣搞笑，曾將自己被移花接木、變成與兩男「大戰」的鹹相Send畀媽咪，點知媽咪未驚過，更幽默指愛女於地氈激戰難度極高，似乎一家三代都遺傳了搞笑基因！
文：外娛組