演衛斯理袋半億連打三季搵奶粉錢
余文樂極速完成人生中結婚、生仔兩件大事，當然要努力搵奶粉錢！他被指以半億片酬拍攝王晶網劇《冒險王衛斯理》，飾演主角衛斯理瞓身拍打戲，連任達華都坦言欣賞其八舊腹肌，王晶亦讚樂仔睇得又打得！
飾演「第九代」衛斯理，樂仔坦言因為題材吸引才接拍：「我未拍過科幻題作嘅戲，加上衛斯理都好耐冇拍，相信會有唔同效果。」此劇將於無綫播出，樂仔直言始料不及：「其實我都估唔到發行會賣去邊，亦冇諗過會喺TVB播。（拍劇同拍戲最大分別係乜？）主要係體力同時間比較長，我哋有三季，大部分演員每一季都唔同，我就三季都有，連住拍體力消耗好大！」
