余文樂揀Job陪湊仔承諾二人世界

現年36歲的型男余文樂前日「升呢」為人父，太太王棠云誕下兒子Cody，他即時於社交網上載囝囝半面及手仔照片，分享喜悅！昨午12時許，戴上口罩及Cap帽的樂仔在一名女士陪同下離開醫院，期間揮手示好，未有停步受訪。隨後，他到健身室做運動，抱着鐵球走來走去，操到面紅兼叫出聲，但原來是為日後長時間抱兒子而練力，獲網民讚廿四孝爸爸！

太太支持添動力

面對生活及家庭的轉變，樂仔接受獨家專訪時坦言一切會以家庭行先：「揀工作都會有少少唔同，爭取可以多啲時間返屋企嘅工作先，再唔係就安排休息時間少啲，希望陪到家人。」

如今成為父母，二人世界的時間將減少，問到「樂嫂」會否投訴，樂仔笑說：「好問題！我太太真係有咁諗，佢有時都投訴：『第時會唔會少咗兩個人相處嘅時間呢？』始終女仔都會想拍吓拖，但係佢已經冇得選擇喇！」不過，樂仔Man爆向太太許下承諾，指一定會給對方另類快樂：「我見到我妹妹有咗小朋友，同老公都有自己嘅私人時間！係要花時間陪小朋友，但都唔係唔開心嘅事。（做爸爸有咩改變？）真係唔知！暫時覺得變化不大，唔知太太覺唔覺有咩變咗呢？」

余文樂探完妻兒後離開，未有停低受訪。	余文樂向太太派定心丸，湊仔以外會抽時間二人世界。	余文樂勤力健身做大隻爸！

對於去年「閃婚」，不少「樂迷」突然「被失戀」而心碎一地，樂仔傻笑說：「真係冇刻意去揀，當你去到某一個階段，自自然然就會遇到啱嘅事同人，從來冇刻意安排幾時結婚、幾時有小朋友。」他直言太太的支持令他更有動力：「多個人同你傾訴、同你去面對、分擔，其實有個伴對我嚟講係好嘅。」

文：影視組

攝：張福宏