吳若希做囡囡榜樣轉性唔做臭四
吳若希（Jinny）自誕下寶貝女淼淼後，深深體會到「養兒方知父母恩」，臨近母親節，自認臭脾氣的她，甘為囡囡徹底改造，戒大使兼不再「臭四」，誓變作溫柔賢妻，以免女兒將來變成人見人驚的「極品Jinny」。
日前Jinny和老公何兆鴻（Alex）預早慶祝母親節，雖然囡囡只得一歲大未識送禮物表心意，但見淼淼健康成長，做媽媽的已心滿意足：「佢好孝順，識餵我食蛋糕。」而Alex就代女送母親節賀卡，更安排母親節正日時，一家三口返澳門和老爺、奶奶食飯，她說：「會順便慶祝埋我生日（5月23日、26歲），唔使老公送大禮，因為我哋要換樓，講咗唔可以亂使錢，況且我嚟緊會喺珠海開實體店，之後我要去日本做嘢，老公叫我唔好再掃兩大篋BB衫返嚟，依家我要努力賺錢，搵多啲就可以提早退休，享福陪仔女。」
曾萌「唔要BB」念頭
Jinny未婚懷孕時，因和Alex分手而萌「唔要BB」的念頭，慶幸她未有付諸行動，現時回想當初，她表示只是一時迷惘，她堅定地說：「我唔會唔要BB，嗰時只係一下唔知點算先咁諗啫！」她又說做了一年媽媽，覺得自己耐性多了，女兒扭計大叫跟她鬥長氣，也不會嬲反而會自創故事氹女，不過仍有不少進步空間，皆因囡囡人仔細細卻大脾氣，令她立下決心要改變：「我聽人講啲女會學媽咪，我對個女就好溫柔，但對老公就唔會，其實我係學阿媽成日好惡咁鬧老公，所以依家我要學習溫柔，畀個好榜樣佢。」
她說到母親節願望，除了是雙方媽咪、嫲嫲身體健康，亦望囡囡早日入學，屆時兩母女齊齊讀書，她覺得：「做咗媽咪後，好似乜嘢都要重新學習，再次認識呢個世界。」
文：音樂組