古巨基墮2米台底傷頸強撐開騷

歌手古巨基一連五場紅館《WE我們古巨基世界巡迴演唱會香港站特別版》前晚開鑼，昨晚基仔在紅館舉行第二場演出，但現場消息指基仔乘時光機唱完第一首歌《爆了》後，時光機在其身後從升降台降落台底，形成舞台上有個大窿，不為意的基仔差錯腳，向後行跌了落台中間的窿，並大叫一聲，震驚全場！由於舞台與台底約有2米距離，由此高度跌下可大可小，現場工作人員立即衝入後台幫手。約十分鐘後基仔才上返台，全場即報以歡呼聲！

古太嚇到眼濕濕

他邊摸後頸，邊向大家報平安：「我好想繼續落去，我會盡力繼續落去，唔好嚇親大家，冇事嘅，冇事嘅。」然後踱步證明自己「行到」，並笑笑口說：「我行到，大家唔好緊張，唔好擔心，上天保佑我，冇事嘅！」然後唱出《必殺技》。而經理人霍汶希則表示基仔可能跌傷後頸，事發後她即趕去紅館探望，表示基仔完騷後會到醫院檢查，亦指他傷勢不是太重。而據知基仔老婆Lorraine在後台嚇到眼濕濕。

放大圖片	發生意外後，基仔仍堅持繼續開騷，但見他樣子猶有餘悸。	基仔強撐上台，摸住受傷的後頸，向觀眾報平安。

最可愛係扯鼻鼾

而基仔在前晚的頭場大方分享與Lorraine的愛情故事，表示今次在紅館開騷已變了人夫，又笑言好像娶了周星馳回家，因Lorraine常帶給他很多歡樂，例如常講錯話要他估：「佢會話『快啲攞個雪櫃去芝士蛋糕』，佢好鍾意叫我重組句子。」又笑言Lorraine扯鼻鼾時最可愛：「最平靜嘅佢就係最可愛，但其實我想講係佢喺屋企好舒服、安全咁瞓覺，就咩都值得。」此外，基仔邀得草蜢做嘉賓，感激草蜢下午拍完廣告就趕來撐場。

基仔墮台後工作人員即一擁而上，為其檢查傷勢。	出事後，在台底的古太即衝前察看老公基仔情況。	放大圖片

文：音樂組

攝：張福宏